North Eastern Hills University (NEHU)-o NEHUSU aro NEHU Unit ni KSU rang sal 15 na okgimu chake Vice Chancellor Prabha Shankar Shukla ko kamoni ra∙galchina dabianirangko batanggimin sal somoirangoni dakangenga. Ia obosta ni a∙sel Post-Graduate (PG) aro gipin professional course rangni porikkarangko ra∙doate mikkang bilsi February jao ong∙atna tik ka∙na nangaona ga∙akaha.
NEHU porikkarangko pangnan December jao ong∙atrongani gisepon ia ong∙enggipa obostarangko nigrike Academic Council gital academic year ni tarikrangko taritaina tom∙aniko ong∙ate tik ka∙angaha. NEHU-o ra∙rongbewal gita class rangko ra∙taina somoi nangdapani gimin NEHU ni chatro chatrirang baksa golpogrikaniko dakangaha. NEHUSU aro NEHU Unit ni KSU rangni okgimu chake jingjengataniko dongtongchina didianiko dakgenchimoba uamang knachakjahani a∙sel NEHUSU, NEHUTA aro NEHUNSA baksa golpogrikange NEHUNSA-nigita adita administration ni kamrangko ka∙china bon∙kame raiko on∙angaha.
Ia jingjengataniko ka∙anichi chatro chatrirangni cha∙a ringa gri sae dongenggiparangni kobor rangko medical team aro doctor rangoniko sing∙sandianiko dakangan baksana biljrime saaoniko naljokatchina bi∙anikoba dakangenga ine NEHU Vice-Chancellor ni charge Prof. Nirmalendu Saha parakangaha. NEHUSU ni indake okgimu chakani a∙sel chatro chatrirang salrikitan hospital-ona admit ka∙aniko nikna man∙enga ine NEHU ni Chief Medical Officer Carol Mukhim aganangaha.
Mijal salni bako Mawlai Town Dorbar (MTD) ni delegate-rang NEHU ni chatro chatrirangko gronge uamangni okgimu chakaniko dontongatchina mol∙molangaoba Prof. Shukla ko kamoni ra∙galja dipet jingjengataniko dontongatjawa ine chatro chatrirang u∙iatangaha. Unbaksana mikkangchi Vice Chancellor (VC) ko Dorbar ni gita university campus ni ning∙o napna on∙jawa ine MTD ni President Herlambok War raken aganangaha.
