West Garo Hills, Selbalgre songo salgnina ong·atanggipa Bilgaro VIII edition-ko da∙al sal bon·kame susaate matchotaha. Da·al November 16 tariko Hill Climb category-ko Aguragre, Chidekgre Albela ramao ong·atangaha.
Chang VIII-gipa Bilgaro gari salsusaanio a·dokni damgittam biaprangoni jekai Shillong-oni sak 5, Tura-oni sak 5 aro Williamnagar-oni sak 1 bakko ra·angtokaha. Ia susaanio dingtang dingtang bakrango chong·motan SUV, Car aro Rookie category-o salsusaataha.
Rookie category-o skanggipako Anthony Sangma, gnigipako Veanny Mawrie aro gittamgipako Sargam Sangma man·aha. Car category-ni skanggipa biapko Ronan Bazeley, gnigipako Ryan Silkam Sangma aro gittamgipako Ruchir Marak cheangaha. SUV category-o skanggipako Larry Mukhim, gnigipako Issac Momin aro Ruchir Marak gittamgipako man·angaha.
Uandake Overall category-o skanggipa gadangko chegipa Larry Mukhim, gnigipako Issac Momin aro gittamgipako Ronan Bazeley cheangskaaha. Ia susaanio bakko ra·e chegiparangna trophy baksa adita tangka paisarangkoba mongsonggipa sokgipa Mahindraganj MLA Sanjay Sangma, MDC Rakesh Sangma aro gipinrangni jakchi on·angaha.
