Indian National Congress-ni youth wing jean Indian Youth Congress (IYC) ni gita Meghalaya a·doko memberrangko rimnapna aro dilgiparangko seokna election ko ong·atna miksonganiko da·al salo parakataha. Ia electiono India a·songo dilgiparangko dingtang bewalo seokangna Assembly, District aro State ni gadangrango ong·atanggen ine u·iatangaha.
India a·songni namroro silroroanina kam ka·na dangdike on·agipa chadambe aro sapgipa dilgiparangko seokna IYC kamrangkoba ka·angna ja·ku de·angenga ineba parakangaha. Kakketgipa democracry-ko party ni ning·o rakkie kam ka·na dilgiparangko seokanio pilak party na dangdike on·giparangni raiko man·esa seokangnaba tik ka·angaha. Ia ja·kuko de·anian All India Congress Committee-ni President Rahul Gandhi ni Congress party ni ning·o kragipa niamrangko ja·rikan baksana mikkangchina niksamsoe kam ka·ani ong·a jeon Indian Youth Congress (IYC) aro National Students’ Union of India (NSUI) ko bilakdapatna miksonganiba ong·a ineba parakataha.
Ia gitalgipa chasongo a·song gimiko chadamberangna politics ni a·bao bak ra·e kakketgipa bewalo dangdike on·a cholko ra·banagita Youth Congress-nigita kamrangko ka·angenga ine IYC-ni National President Uday Bhanu Chib janapangjolaha. Indian Youth Congress o member ong·e napna sikgiparang aro electiono bak ra·na gisiko nanggipa pilak chadamberangan register ka·na man·anggen jean sapgipa candidaterangna namgipa cholko on·anggen ineba Uday janapangaha. Unbaksana chadamberangna register ka·aniko altubatatna “With IYC” mobile app koba Android aro Apple Play Store rangoniko download ka·e dorgasto galna man·gen ineba parakangaha.
