Adita salrangna skang NEHU Shillong aro Tura campus ni chatro chatrirang Vice Chancellor (VC) Prof. Prabha Shankar Shukla ni ka∙gipa kamrangko jegale jingjengate uko kamoniko ra∙galchina dabianganiko dakanggenchimoba da∙ona kingking VC an∙tang kamko watkujani a∙sel ia ong∙enggipa obostani bidingo nirokatchina Tura NEHU Campus ni chatro chatrirang Tura ni MP Saleng A. Sangma na chitti sedoataha.
Ia chittio Prof. Shukla ni Vice Chancellor ni kamko jako ra∙a ni ja∙man adita NEHU ni dingtanganirangko janapangaha jeon uamang NEHU ni tang∙doani pal batesa tang∙ondapanirangko nikna man∙angaha ine u∙iatangaha. Una agreba Registrar aro Deputy Registrar ni kamrangko ka∙na kragipa manderangko seokgijaniko, NEHU ni campus o gitcham NEHU bus rangko jakkalkuengani bidingo, hostel ko nirok simsakgija galchipenganiko, library rango ki∙tap rangko chu∙onggija rakkiani, poraichakram biaprangko name dake niroke gital dake taridaptaina nanganiko aro non-teaching staff kamrangna rimnapaniko a∙bachengatkujani a∙selo chatro chatri rangna namen neng∙nikanirangko man∙enga ine u∙iatangaha.
Unbaksana Vice Chancellor ni NEHU Students’ Union Tura (PGSU) ko ra∙galanichi chatro chatrirang PGSU ni gita ku∙rang on∙a man∙jani a∙sel ding∙chaotaniko ra∙baan baksana neng∙nikanirangko baridapataha ineba parakangaha. Re∙anggipa bilsirango PGSU ni dongmiting somoirango chatro chatrirangni chagrongenggipa neng∙nikanirangni bidingo agana gita PGSU-nigita mingsa ku∙rang on∙ani chol ong∙achim ine janapangaha. Indake Vice Chancellor-ni Student’s Union-ko ra∙galanina aro Tura-o Pro Vice Chancellor ni kamko ra∙gale “Campus-in-Charge” ine mingjite donskaanian niam ko pe∙e Campus ni kamrangko nirokna aro name dake chalaina amsokgijaniko nike Shillong aro Tura Campus ni chatro chatrirang apsan bakrime VC-ko uni kamoniko ra∙galchina dabiangenga.
Inakde VC-ni kragijagipa kamrangko ra∙chakna man∙jae aro amangni dabianiko da∙ona kingkingba knachakjanina Shillong ni NEHUSU dolrang antisana batpile okgimu chake jingjengatangaha. Ia ong∙enggipa pilak obostarangko nirokate NEHU ko nambata gadang-ona ra∙bataina man∙agita nanggipa ja∙kuko de∙china MP Saleng Sangma ko NEHU Tura ni chatro chatrirang mol∙molangaha.
