Bilgaro VIII edition-ko da∙al sal November 15 oni 16 tarikona West Garo Hills-ni Selbalgre songo Tura Motor Sports Club (TMSC) dolrang ong·atangenga jeon sianggipa Noverfield R Marak-ko gisik ra·anikoba dakangjolaha. Skanggipa salo flag off ka·aniko TMSC dolni jakchi pring 9:30 bajioni Selbalgre Solace Resort-oni a·bachengataha.
Ia gari salsusaanio a·dokni dam gittam biaprangoni jekai Shillong-oni sak 5, Tura-oni sak 5 aro Williamnagar-oni sak 1 susagiparang bakko ra·angtokenga. Ia susaanio SUV, Car aro Rookie category-o pangchake susaaniko dakangenga jeon driver sakprak category ge·prako bakko ra·angenga. Ia susagrikaniko Bibragre songni 2.5 km ong·gipa ramao salsusaaniko ong·atangenga. Gnigipa salni kal·susaaniko jean knal pring November 16 tariko Hill Climb category-ko Aguragre ramani Chidekgre Albelao ong·atangskagen.
