56-Gambegre constituency bye-election o kam tikatako man·gipa election official-rang nanggipa lekka pancharang, EVM aro gamchatgipa bosturang baksa WGH Deputy Commissioner Office-oni da·al salo dingtang dingtang polling station-rangona re·chakatangaha. Ia bye election-o ge 12 sector-rangko sualaha chong·motan 12 sector officer-rang aro 12 police sector officer-rang parade ground-oni gario gadoani joljol dingtang dingtang polling station-rangona tom·tome uamangko dilange donegen.
Returning Officer, Nipon Hajong-ni agananigitade election-ko maming neng·nikani gri tom·tome matchotatna man·agita bye election-ko parakata bikan CRPF-rangko watatmananiko u·iataha. Unbaksana, a·dokni police-rangkoba watatmanaha jeon uamang jringnan nirikkianiko dakenga ine Returning Officer parakangaha. Gambegre constituency-ni ning·o ge 9 police naka ba nirikkianiko dakgipa a·damrang gnang ineba ua janapangaha.
Iasan ong·aigija maiba ong·gija dakanirangko nirokna Flying Surveillance Team (FST) ge 9, Static Surveillance Team (SST) ge 9 aro campaign-rangko nirikkina Video Surveillance Team (VST) ge 6 gnangchim ine Hajong aganangaha. Election-ko tom·tomanio matchotatanian Commission-ni dakna nanggni ong·a aro batanggimin bilsirangogitan ia changoba name maming neng·nikani gri election-ko tom·tome ong·atanggen ine Hajong ka·donge aganangaha.
Pu·onani knal pring 7 bajioni a·bachenge attam 4 bajio matchotgen.
