November ni 12 tarikni pring 1 baji mangni somoio Boldamgre ni MDC Stevie Marak, Jembagre songni Jostview D Sangma-ko kragija jak de·e aro slai ko bikote ka·mikenatanina uni kosako Damalgre Police thana-o badi ka·doangaha. Ia obosta ko songni manderang, political party ni manderangni tangka paisa rangchi pu·onaniko brejachina gita songo nirokaniko dakengmiting somoio chagrongaha ine u·iatangaha.
Election Commission ni niamo on·gimin gita party-ni dilgiparang aro kam ka·giparang November 11 attam 4 bajio-oni tom·ani ba manderangni nokchi re·e campaign ka·na man·gijaniko niamko ra·gataha. Unbaksana Arms Act ni ning·o slai ni license donggiparang election ong·na skangan police thana o uamangni slairangko donena nangani niamkoba ra·gataha. Indake ong·genchimoba Boldamgre ni MDC Election Commission-ni dongimin niamrangko dal·en pe·aha ineba u·iatangaha.
Indakgipa niamni a·palo kamrangko ka·anina, Stevie Marak ni slai ni license ko den·galchina aro niamgita raka sasti ko ta·rakalen on·chinaba Damalgre Police Thana ni Officer-In-Charge ko badi ka·dogipa Jostview D Sangma didiangaha.
