South West Garo Hills Ampati-ni St. Claret Higher Secondary School-o chadamberangoni dilnagiparangko mikkangchina tarisamsona “Building Young Leaders : Empowering Adolescent Boys and Girls with transformational Life Skills” program ko da·al salni bako a·bachengatangaha.
Ia program ni gita chatro chatrirang, skigiparang aro skiani bidingo kam ka·giparangko mande ra·anganiko dakangaha. Betasing C&RD Block ni BDO Crystal Ripamchi N. Sangma aro Office of the Jt. DSEL, Tura ni SEO Taposh Ch. Marak mongsonggipa sokgiparang ong·e programo bak ra·angaha. Ia tom·aniko Meghalaya Institute of Governance ni Program Coodinator June Hannifer Warbah dilanganiko dakangaha.
Ia programko ong∙atani miksonganiara mongsongbate skigiparangna bilko on∙e uamangni skulrango chatro chatrirangna dangdike on∙anio namdapatna ong∙a. Ia training-o bak ra∙anggipa skigiparangko dingtang mancha ka·donganiko bilakdapatna, agan-golpogrikanio, nanggipa ja·kurangko de·ani, bebe ra·aniko mesokani, me·a me·chikni man∙a nanggni, an·seng baljokani, rongtal an·tale dongani aro class rango saksa sakgipin baksa agangrikani bidingo u·ie ra·ani cholrangko ma∙siatchina didiangaha. Iarangko dakanichi chadamberangni ka∙donganiko aro chanchianirangko uamangni miksongatangko bilakatna dakchakani ong∙anggen.
Ia program-ni gamchataniko ma∙sie ra∙nagita chatro chatrirangni u·i ma·sianirang baditana kingking barianiko nipiltaianikoba dakangaha jeon Sombar salo ong∙atgipa tom∙anio skigiparang aro chatro chatrirang uamangni skie ra∙gimin bakrangko parakangaha. Chatro chatri rangni programo gisik nangbee bakko ra∙anina uamangna adita on∙pilskaanikoba dakangaha.
Meghalaya a·doko indakgipa program rangko a·dok sorkari aro bida pakwatgipa a·damrangni dakchakaniko man·e gipatna man∙anian rasong chabeani ong∙a ine Meghalaya Institute of Governance-ni Director Aiban Swer uni kusi ong∙aniko parakangaha. Skigiparangna ia bilsioni a·bachengatgipa Training of Trainers (TOT) session ni gita chadamberangko dilgiparang ong·atna Meghalaya Institute ra·ken kamrangko ka·angna manchiani kattarangkoba janapangaha.
