Meghalaya a∙doko ma∙giparangni an∙pakani somoio janggi galaniko re∙anggipa bilsi bri ni gisepo 50% mangni gita komianiko nikna gita man∙aha aro mikkangchi 50% oniko tang∙onatna kam ka∙anggen ine Health Department-ni Principal Secretary Sampath Kumar u∙iatangaha.
Ma∙giparangni janggi namen gamchatbegipa ong∙aniko ma∙sie ra∙e uamangni an∙pankani somoio janggi galaoniko naljokatna anti changantin review meeting ba nipiltanianirangko ong∙ate dakchakna nanggnigipa kamrangko aro ning∙tue a∙selni ja∙pangrangko sandie janggi galaniko komiatna kam ka∙angani bidingo nianggen ine Kumar aganangaha.
Chief Minister’s Safe Motherhood Scheme (CM-SMS) programme ni dakchakanichi da∙o bi∙sa aro ma∙gipani sianiko komiatna man∙aha. Ia programme Medical Officer-rangna bilongen gamchatbegipa bak ong∙a jeon nangmiting somoio ma∙giparangko dakchakna on∙a man∙enga. Garo Hills ni Purakhasia songni PHC-o oko donggipa ma∙giparangko sanchakna chu∙gimik ge∙chikung biaprang gnang. Mikkangchi nambata sanna bannaniko on∙a man∙agita sanchakram biaprangko bariatan baksana ultrasound machine rangkoba ra∙bae sabisirangko senggnang u∙ina man∙a gita kamrangko ka∙angenga ine Kumar parakangaha.
Chonchongipa PHC aro CHC rango ultrasound ko ka∙na changgipa doctor-rang dongjani a∙sel da∙o Tamil Nadu ni sorkari baksa bakrime sak 60 doctor-rangna nanggipa trainingrangko on∙enga maina bilsio sak 80,000 mangni bi∙sarang atchienga jenan nambata sanna bannanirangko baridapatna nangenga ine Kumar agandapangaha.
Da∙oni gita department rang oko donggipa ma∙giparangni gimin u∙ina nanggiparangko bakan ma∙sina man∙e ja∙kurangko de∙na dakchakenga. Unbaksana Meghalaya a∙dokna ma∙mong sorkarini gita mikkangchi dakchakaniko on∙anganichi gimik dakgipa gadangrangon nambata sanna bannanirangko ra∙bae on∙a miksonganikoba parakataha.
