Chang 48-gipa Wangala Festival 2024 ko West Garo Hills ni Chibragre, Wangala A·dam o da·al saloni a·bachengataha. Wangala maniani skanggipa salni tom·aniona West Garo Hills-ni Deputy Commissioner Jagdish Chelani mongsonggipa ong·e bakko ra∙angenga. Ia tom∙anio HDWFC ni Chairman, Ronald Rikman Sangma sokbagipa pilakon ka·dimeani aro kusini kattarangchi rimchaksoaha.
Ia Wangala manianiko salgittamna jean November 7-oni 9 tarikona ong·atangenga. Ia chang Wangalao Garo Hills-ni dingtang dingtang song nokrangoni dol 10 mang chrokgiparang bakko ra·e skanggipa, gnigipa aro gittamgipa biapna susaangtokenga. Chroksusaana agreba biltangko saksa sakgipin baksa tosusagriknagita A∙chikrangni adita kal∙anirang jekai Jakpong pe∙a, An·ding o·ka, Wa·pong sika, Ro·ongma de∙susaa, Rong·ma chilsusaa, Budu salsusaani rangoba Garo Hills-ni dingtang dingtang biaprangoni manderang bakko ra∙e susagrikangtokaha.
Wangala Festival-ko pangna bilsigitan A·chikrangni bebe ra·agita pattigipa ra·rongipa Misi Saljong-ko mittelpilna manirongbaenga. Ia dal∙begipa tom∙aniona Garo Hills-ni manderang mangmangsan ong∙aigija, India a∙songoni aro gipin a∙songrangoniba re∙batoke ia maniao bak ra∙anikoba skanggipa salo nikna man∙angaha.
