Gambegre bye-election sepangroroengon susaenggipa dolrang salsa batrikrik constituency-ni ning·o bang·a biaprangona re·angenba krenge campaign ka·anirangko nikna man·enga. NPP doloni Mehtab Chandee Sangma-na Chief Minister an·tangan biap damsaoni damgipinona re·rurae manderangko gronge aro golpoe uamangni dolko seokchina mol·molaniko dakenga. A·dok sorkarini Minister aro NPP dolni ku·wattimgipa Marcuise Marak aro gipin dilgiparangba campaign-o bakko ra·e manderangna uamangni miksonganirangko talatangaha.
Indake ong·engon, Congress dolba ja·manchakgija Northeast a·dokrangoni dilgiparangko okamate candidate-tang Jingjang M. Marak-na ka·kimchae campaign-ko ka·skaenga. Jingjang Marak-na chakpaaniko aro Congress dolni bakrimaniko bilakatna Northeast a·dokni dilgiparang jekai Manipur-ni MP Alfred Kanngam S. Arthur, Assam MP Pradyut Bordoloi aro MPCC President Vincent Pala Gambegre constituency-ona sokbaaha.
Da·al salo Congress dolrang dingtang dingtang songrangona chong·motan Rimrangpara, Kherapara aro Gambegre antidamrangona re·angnasienga. Congress dolrang a·doko saksa kamkam MLA san ong·rikna nange ia bye-election ko cherikna nangao ga·akenga. NPP dolrang single majority-ko man·e a·dokko chalaiengon ia bye-election ko chedaptaigenchimode sorkariko rikna uamangni dolna bilakdapani ong·gen. Apsandake, TMC dolba olgroke dongenggipa cholrangko a·kange an·tangtangna cheani ramarangko tariangenga.
Gambegre bye-election re·baenggipa November 13 tariko ong·nasienga aro result-ko November 23 tariko parakatna tik ka·angaha.
