Meghalaya Football Association (MFA) aro District Football Association (DFA) Tura baksa nangrime ong·atenggipa Meghalaya State League 2024 football kal·susaani bon·kamgipa league match-ko knal attam chong·motan November 6 tarik 5:30 baji mango P A. Sangma Stadium-o kal·atanggen.
Knal ong·nasienggipa MSL league match-ni bon·kamgipa kal·susaanio group A-ni North Garo Hills, Resu-oni Pinggera Do·gisik FC aro West Garo Hills, Tura-ni Chipakkore FC susagrikanggen. Ia susagrikani MSL 2024 football kalsusaanio dolgninan bilongen gamchatbegipa aro amna nangchongmotgipa kal·ani ong·enga. Group A-ni dolrangoni MSL 2024-ni point table-o Lumsohkhlur SC 6 points, Chipakkore FC 4 points, Pinggera Do·gisik FC 3 points aro Attong Matgrik FC 1 points-ko man·e dongenga.
November 6 tariko, group A-ni West Garo Hills aro North Garo Hills dolrangni gisepo kal·susaanio chegipa dol quarter final gadango susana cholko man·anggen. Ia susanio Pinggera Do·gisik FC amgenchimode Goal Difference (GD) chi quater final-ona doangen aro Chipakkore FC amgenchimode 7 points ong·e group A-ni chubatgipa gadangona sokdoangskagen. Dolgni kal·anio apsangrik draw ong·skaode Lumsohkhlur SC dolna skangsoe dongna namgipa chol ong·anggen.
MSL susagrikanio nina namnikgiparangna DFA Tura knalni kal·susaaniko ticket grian stadium-ona nape nina on·enga ine DFA-ni dilgiparang koborna parakatangaha.
