MPSC-ni ong·atenggipa interview aro screening test-ko A·chikrangoni panel board-ni member ong·gipani term bon·ahani gimin dontongchengchina Rongrong constituency-ni MDC Rinaldo K. Sangma, MPSC-ni Chairman-ko gisik ra·atan baksa mol·molataha. Panel-o A·chik jatoni darangba dongjagenchimode Garorangna champenganiko on·e gipin jatrangna namgniko on·skanaba gnang ine Sangma parakataha.
Garo candidate-rangni dingtang dakgipa neng·nikanirangko interview aro sreening test-o ma·sibatna amagita Meghalaya-ni mongsonggipa jatrangoniko apsangrik dake A·chikrangonikoba panel board-o member donaniara gamchatgipa ong·a ine Rongrong-ni MDC janapataha. Sangma, MPSC-ni Chairman-na ia sinjetanirangko chagrongna skang niksamsoe aganatengon A·chik jatoniko panel board-ni member donkuja dipet interview aro screening test-ko dikdiksana dongtongatchina u·iataha.
