EGH, Williamnagar-o ‘Diwali with my Bharat’ ni bakgita October 27-oni 30 tarikona Williamnagar Traders Association, Youth Clubs of Williamnagar, Central Puja Committee-ni bakrime dakchakanichi Williamnagar antidamo Vigilance Awareness Week-ko Nehru Yuva Kendra ong·atangaha. Ia somoio Williamnagar antidamkoba rongtal an·talataniko dakangjolaha.
Ia antini gisepo dingtang dingtang dolrang jekai Traders Association, Williaro gipinrang baksa October 30 tariko tom·e chanchirimanikoba dakangaha jeon WMB-ni Chief Executive Officer Ripamchi N Sangma mongsonggipa ong·e sokbaaha. Tom·anio aganengon, WMB-ni CEO, Diwali-o aro gipin manianirango rongtal an·talaniko a·jao jarikna nangani gamchataniko talatangaha. Sakanti manderangkoba ia kamna Williamnagar Municipal Board aro District Administration baksa ku·cholsan bakrimpachina Sangma mol·molangaha.
