Tura-oni km 15 mang chel·a biapo Rongram sepang jolo police constable saksa ramao gari pangpileke a·sel ong·gipako re·ruraenggipa manderang nikenba uko gario napkete dongako naljokate hospitalona sanna banna rimangaha. Ia obosta Robibar walo Goeragre Chibragre re·gipa rama sepango ong·aha jeon a·selo ga·akgipa mande bilongbee an·chi pakaha aro garitango (ML 08 J 0962) napkete siboke dongaha.
Uni gario napkete dongako Gondenggre Wangala maniako nimane re·baenggipa manderang naljokataha. A·selko chagronggipa Tura Matchakolgre-oni Meghalaya police-ni UB constable Barnath Marak ong·a ine ma·sina man·aha. Chanchichipe agananigitade ua gariko ta·rakale sale a·selo ga·akaha ine u·iataha. Ua an·chirang pakanichi bilongbee saknaa man·aha aro hospital-onaba ua jokom ong·e sokangaha.
