Manderangni ku∙rang ong∙e Gambegre ko gital dake riktaina miksonge da∙al salni bako BJP ni Bernard Marak nomination file ka∙angaha ine janapataha. Ia somoio unbaksa BJP-ni State President Rikman Momin, party ni dilgiparang aro una chakpagipa manderangba re·bae bakko ra·angtokaha.
Meghalaya a∙dokna ma∙mong sorkarini schemerangko on∙atgenchimoba manderang ia scheme rangko man∙jani a∙sel kangal ong∙e dongna nangao ga∙akenga ine Marak aganangaha. Ia pilak obostarangko nigrike songo dongenggipa kangal cholgri-rangna kam ka∙chengna nanggen maina Gambegre constituency-ko niatgenchimode nok jam man∙gijagiparang, game ge∙e cha∙giparangni Kishan card dongijani aro buchuma budepa rangni pensionrangko man∙gijanirang namen bang∙bea ineba Marak parakataha. Indakgipa neng∙nikarangoniko naljokatna kona noksik aro song nokni manderangna ia schemerangni gita janggi tangani cholrangko sokatna ua susaangenga ineba aganangaha.
Ia bye-election o chegenchimode poraia skiani a∙damko namdapatna daitoko ra∙e kamko ka∙angan baksana manderangni ku∙rang ong∙e Gambegreni manderangni neng∙nikanirangko jean Garo Hills ni neng∙nikanirangming apsan ong∙a jekai rama jal∙ang, skul nokrang aro gipin nanganirangni bidingo niroke kam ka∙anggen ine Marak agandapangaha.
