South Garo Hills, Rongara Block-ni ning·o donggipa Gulpani Nokat songo processing unit donganichi ge·e game cha·giparang uamangni man∙gimin biterangoniko dingtang dingtang bosturangko tarina cholko man∙angenga. Uamangni ge·gimin bosturangko salantio breanirang 1.5 MT ona sokdoangenga. Indake man·dapanian ge·e game cha·giparangna aro Co-operative processors dolgninan namgniko ra·baenga ine u∙ina man∙aha.
Ge·e game cha·giparangoni bosturangko re·ange ra·anichi, bang∙a chonchongipa gadango game cha·giparangan songtangni antidam-rangoniko ia biterangko nengrae man·a dakchakanichi tangka paisanigita gamna nanganirangkoba komiatna dakchakskaenga. Indakgipa kamrangko a·song gimikni biaprangonaba ja∙rikna man∙genchimode, ge·e game cha·gipanasan ong·aigija songadam nokadamrango manderangna nambata janggi tangani cholrangko ong·katatna dakchakaniba ong·anggen.
