District Basketball Association (DBA) ni Don Bosco College,Tura-o ong·atenggipa Open Basketball Tournament-o measarangni gnigipa semi-final ko mijal salo G-Force aro Don Bosco School Mendal dolgnini gisepo kal·susaangaha. Gnigipa semi final-ko susaanio G-Force dol 68-60 points-ko man·e 8 points-ni dingtanggrikanichi DBC Mendal dolko amate chegipa ong·enba final-ona sokdoangaha.
Kal·a a·bachengaoni dolgnian biltinggrik susaangaha aro bang·gija points-rangchisan dingtanggrike dolsa dolgipinna skangsona man·aha. DBC Mendal krengbee kal·genchimoba sakgni kal·giparangni fouled-out ka·a man·anichi bilgriaona ga·akaha. Indake ong·genchimoba uamang bon·kamaona jotton ka·e kal·angaha aro 8 points-ni dingtanggrikanichisan semi-final o sirikaha.
Kal·susaani bon·anggipa quater-o G-Force dolna Pappu Mahato name dakmesokangaha jeon ua saksan 34 points-rangko man·e doltangko final-ona sokdoataha.
Me·chikrangni gnigipa semi final-ko da·al sal 3 bajio Resubelpara jolni Salgro13 aro Tura ni Shehoops baksa kal·angskagen. Iamangoni chegipa dol Kawate dol baksa final-ko kal·susaanggen.
