Shillong-Nongstoin-Rongjeng-Tura ramako tarina chamatgimin gong 2366.77 crore tangka paisarangoniko contractor aro a∙dokni Civil Engineer-rangni jakkalsretaniko pulis dolrang am∙sandina a∙bachengataha. Ia kragija tangka jakkalsretani bidingo mokordoma ka∙ange am∙sandinagita skanggipa gadango kamrangko ka∙angenga ine saksa Senior Police Officer u∙iatangaha.
FIR ka∙anio chu∙gimik sak 9 manderang bak donga ine u∙ina man∙aha jeon a∙dok sorkarini senior engineer-rang aro Telangana aro Haryana-ni ge∙gni private company-o kam ka∙giparangba jak donga ine parakataha. Indake ong∙genchimoba dos dakgiparangko da∙o dipet rim∙na man∙kujaenga maina iani bidingo name dake ning∙tue am∙sandina nangan baksana lekka pancharangko chimonge aro kakketgipa sakkirangko man∙a nangchengenga ine police officer aganangaha.
Ia project ko 2010 bilsio Special Road Development Programme-North East nigita ma∙mong sorkari ra∙chakangaha jenan gong 1303.83 cr tangka chamatgipako changni chang nipiltaianiko dake gong 2366.77 ona bariataha jekon 2014 bilsio matchotatna somoiko tik ka∙angaha.
Private Company rangni ia contract na nipiltaianiko dakchina dabianiko Department ni namnikgijaniko mesokani a∙sel niam gita ja∙rikgijaniko nike Arbitral Tribunal ona bichal ka∙na sokangaha. Ia am∙sandianirangko dakanio engineer aro officer rangni bakrime tangka cha∙bokani, togiani, see rakkainirango kakket ong∙gijanichi a∙dokni gamna noksan ong∙aniko ra∙baani a∙sel PWD (NH) ni Chief Engineer AM Kharmawphlang FIR ko ka∙doangaha. Ia ong∙gipa obostarangko niamni gita tale roke ma∙sinagita pulis dolrangni name dake am∙sandianiko dakna nanggen ine u∙iatangaha.
