Re∙baenggipa Gambegre bye election-o All India Trinamool Congress oni susanasienggipa Sadhiarani Sangma da·al salo nomination file ka·angaha. Ia somoio Sangma-na bakrimpaaniko mesokna uni segipa Zenith Sangma, Songsak-ni MLA Dr. Mukul Sangma, MDC rang aro una chakpagipa manderangba re·bae bakko ra·angtokaha.
Gambegre constituency-o bang∙a rama jal∙angrang namjani a∙selo songdongenggipa manderang sagiparangko sanna bannaniko dakna gipin biparangona ra∙angnagita neng∙nikaniko man∙ronganina ramarangko mongsongbate namdapatna ja∙kurangko de∙anggen ine Sangma kobor ra∙timgiparangna parakataha. Unbaksana constituency-o dongenggipa bang∙a manderang kangal cholgrirang ong∙ani gimin uamangni janggi tangani cholrangko tang∙doatna kamrangko ka∙angna miksonganirangkoba janapangaha.
Electiono susaani bidingo sing∙aniko dakon, Gambegreni manderang una namen ka∙sabeanina aro pangchakanina, Sangma uni chena ka∙dongsoaniko parakangaha. Iako aganengon, NPP ge∙sa sorkariko rikenggipa party ong∙ani gimin ia re∙baenggipa electiono ua NPP ni Mehtab Chandee A Sangma baksa biltinggrike susana nanggen ine nikaniko aganangaha.
Election Commission of India (ECI), Gambegre bye-election ko re∙baenggipa November 13 tariko ong∙atna batanggimin salrango parakataha.
