South West Garo Hills, Ampati-o District Sports and Youth Affairs-nigita District Level Youth Exchange Programme-ko mijal salo Multi-Facility Centre-o ong·atangaha. Ia program-ko ” Today’s Youth, Tomorrow’s Leader” ba “Da·alni chadambe, knalni Dilgipa” ine katta bichongko donenba ong·atangaha.
Ia program-o District Sports Officer Saljagring M Marak mongsonggipa sokgipa ong·e chadamberangni mikkangchi a·doko dilgipa ong·e changa sapanirangko skie on·skana aro dilgipa ong·ani gamchatani bidingo aganangaha. Ia Youth Exchange Programme-o SWGH a·jani ge∙bri skulrang bakko ra·ange an·tangtangni changa sapanirangko dingtang dingtang susaanirang jekai noksa salani, A∙chik jatni chrok mesaani aro chasong gitchamni ring·anirango bakko ra·angtokaha.
Ia program-o Quiz Competition-ko ong·atanio Hawakhana Higher Secondary School-ni skigipa Sanjib Das dakdilangskaha. Ia Quiz Competition susaanio skanggipa gadangko Springfield Higher Secondary School-ni Desagra A Sangma aro Krebingstone M Sangma man·angaha. Gnigipa gadangko Nogorpara Higher Secondary School-ni Mesime S Sangma aro Madona M Marak man·angskaha.
Noksa salsusaanio skanggipa gadangko Nogorpara Higher Secondary School-ni Anania G Momin man·angaha aro gnigipa gadangko Springfield Higher Secondary School-ni Pisan M Sangma man·angskaha. Solo folk song category-o Anania G Momin skanggipa gadangko aro Grikbeanchi S Sangma gnigipa gadangko man·angaha. Solo folk dance-o Nogorpara Higher Secondary School-ni Joshmi M Sangma che·gipa ong·aha aro runner up-ko Springfield Higher Secondary School-ni Tensu D Sangma man·angaha. Apsandaken Springfield Higher Secondary School group folk dance aro group folk song-o skanggipa biapko man·aha aro Nogorpara Higher Secondary School gnigipa biapko man·angskaaha.
Ia Youth Exchange Programme-ko ong·atanichi SWGH a·jao donggipa chadamberangna jatni daka rikanirangko bilakdapatna miksonga gnang ong·atangaha.
