Kamtangko dangdike on·e siang bon·anggipa police-rangko gisik ra·nagita mijal salo Police Commemoration Day-ko SWGH a·jao dakangaha. Uamangni police department-na bimchipe dangdike on·aniko gisik ra·ani salo Sok Parade-ko dakangan baksana slai goanichi aro pul bibalrangko done mande ra·pilangaha.
A·jani SP Brilly Graham Marak, tom·ani gamchataniko talate 1959 bilsio Ladakh-o Chinese force-rangni CRPF-rangko chadrapanio sak 10 sipairangni janggirang gimaaniko janapangaha. Ua, dingtang mancha law enforcement officer-rangni kamtangko ka·e janggitangko on·kangani gamchatanikoba parakangaha.
Deputy SP, Ravi K. Sangma, 2023 bilsini September 1 tarikoni 2024 August 1 tarikona janggitangko on·kange kam ka·anggipa a·song gimikni sak 213 sipairangni bimingko minge on·angaha. Ia sipairangan a·songtangko aro a·jatangko bobil dolrangoni naljoke rakkina kamtangko bimchipe ka·e janggitangko on·kanggiparang ong·a. Ia salko gisik ra·anian uamangko dingtang mancha mittelpilani aro mande ra·pilaniko mesokskaaniba ong·a.
