Tura-ni MDC Bernard N. Marak a·dokni Scheduled Tribe-ni ning·o ga·akgipa chatro chatrirangni scholarship-na dorgastoko galanio neng·nikanirangko nirokatchina Union Minister Jual Oram-na chittiko sedoataha.
Scholarship-na dorgastoko galgipa chatro chatrirangoniko income certificate aro affidavit ka·ani lekkarangko Autonomous District Council (ADC) ni palo a·dokni official-rangoniko ra·na ge·etanirangko dakanichi chatro chatrirangna neng·nikanirang ong·enga ine Marak aganangaha. Indake ong·engon Autonomous District Council-oni on·gipa income certificate aro affidavit ka·gipa lekkarangko Scheduled Tribe-ni ning·o ga·akgipa chatro chatrirangoniko ra·chakna nanga ineba Marak janapangaha.
Bang·bata chatro chatrirangan kangal cholgrigipa nokdangrangoni ong·ani gimin dorgastoko galani somoio gamna nanganirangkoba gamsokjae korosnigita neng·nikanirangko man·e scholarship-na galrikaniko dontongna nangaona sokenga. Iani bidingo bang·a chatro chatrirangan suk ong·gijaniko Marak-na parakataha. Unbaksana, re·anggipa bilsini scholarship-kon da·onaba on·kujaenga aro daito ga·akgiparango chatro chatrirang janapoba nirokatjaenga ine Marak parakataha.
Uni gimin ST chatro chatrirangni neng·nikanirangko ta·rake nirokate ADC-ni on·gimin lekkarangko ra·chakchina aro scholarship-na dorgastoko galani somoikoba ra·dodapatchina Union Minister-o mol·molangaha.
