A·chik Holistic Awakening Movement (AHAM), Central Executive Body (CEB) H.Q Tura, Zikzak block-ni ning·o adita nanganirangko nirokatchina Chief Minister Conrad Sangma-na chittiko sedoataha.
Zikzak block-ni ning·o ta·rake dakna nangenggiparangara skanggipao Zikzak Public Health Centre-ko Community Health Centre-ona dakatchina AHAM dolrang didiangaha. Sanna bannaniko dakna re·bagipa manderang jel·batanichi sanchakram biapo neng·nikanirangko chagrongna nanganina namdapatna nanganiko uamang janapataha.
Gnigipao, poraienggipa chatro chatrirang college-rangona salantian km 15 aro km 16 mangni chel·ao donggipa Mahendraganj aro Ampati-rangona re·angna nange kangal cholgrirang re·runa tangka paisarangnigita neng·nikanirangko man·enganina Zikzak block-ni ning·o Degree College aro Technical College rangko kulie on·china aganangaha. Unbaksana Zikzak Jolo donggipa bang·a chadamberangan kal·susaanirango gisiko nanggiparang dongani gimin uamangni changa sapanirangko ranta ka·na man·agita Zikzak jolo Multi-Purpose Sports Complex-koba tarie on·china AHAM dolrang janapangaha.
Una agreba dingtang dingtang program-rangko ong·atchakna man·a stadium-ko on·china, boxing, badminton aro martial arts rangko skie ra·chakna gita training Centre-rangko ku·lie on·chinaba AHAM dolrang Chief Minister Conrad Sangma-o mol·molangaha.
