South Garo Hills Chokpot C&RD Block-ni BDO kobor ra·timgipa saksani kosako kragija matnange agane champengataniko dakanina Garo Hills Press & Media Association (GHPMA) dolrang jegalaniko dakangaha.
Ia ong·gipa obosta batanggimin salrango Chokpot jolo mikka jimbee waanichi chi bana ong·e bang·a nokjamrangni nisiatako man·gipa nokdangrangko re·ange gronge adita sing·sandianirangko dakanggipa kobor-ko “NEIG News” ni Youtube Channel-o parakatgipa giproroani ja·mano ong·angaha. Indake uni parakatgipa koborrangko niksoe re·anggipa October 12 tariko Chokpot C&RD Block-ni BDO uko South Garo Hills Deputy Commissioner-ni Chamber-ona okamataha.
Press & Media ian ge·sa jakgitel ong·e manderangna kakketgipa koborrangko parakatgipa ong·a maming dakeba executive aro Administrative-nigita indake champengataniara kragipa ong·ja ine Garo Hills Press & Media Association dolrang aganangaha.
Indake kragija champengataniko dakanina uni kosako kragipa ja·kuko de·e kakketgipa bichalko ta·raken on·china GHPMA-ni President Sanggra M Marak aro GHPMA-ni General Secretary Dalseng A Sangma mol·molangaha.
