Adokgre Regional Unit-ni Achik Holistic Awakening Movement (AHAM) dolrang baksana Nokma, Sordar aro Adokgre-o songdongenggipa manderang MGNREGS-ni ning∙o sal 100-ni kamrangko sokatkujaenganina Chief Minister Conrad K Sangma-na chittiko sedoataha.
“National Rural Employment Guarantee Act, 2005” o pangchake songadam nokadamrango komibeoba sal 100-ni hajirarangko salantio kam ka·giparangna bilsi prako on·a ku·chakgenchimoba Adokgre C&RD block-ni ning∙o bang∙a Village Employment Council (VEC) baksana Job Card donggiparangba uamangni man·a nanggnirangko man·kujaenga ine AHAM dolrang aganangaha.
Re·anggipa 2023 bilsio bang∙a songrangon sal 18 ba 24 rangkosan bilsi gimiko kamrangko ka·na ge·etangaha. Ia bilsio kamrangko sokatanio ru·utataniko sorkarini gitaba maming u·iataniko niksona man·kujae gimik songrangon salsaba kamrangko ka·na da·alonaba a·bachengna man∙kujaenga ine AHAM dolrang janapangaha.
Indake kamrangko ru·utatanichi salantio hajira kam ka·e cha·gipa manderangna neng·nikaniko mangmangsan on·aigija ian MGNREGS-ni ning∙o tarigimin niamrangko aro India-ni Constitution-nigita kangal cholgri manderangna uamangni man·a nanggnirangkoba niam pe·aniba ong·enga ineba agandapangaha.
Adokgre-ni ning∙o dam 44 songrang donga jeonin ge 10,000 nokdangrangan Below Poverty Line (BPL) ba kangalgipa nokdangni ning∙o ong·e ge·e game cha·aniosan pangchakgiparang ong·ani gimin bang∙a neng·nikanirangko chagrongna nangenga ine AHAM dolrang aganangaha. Ia pilak neng·nikarangko niate salantio kam ka·e cha·giparangna MGNREGS-ni ning∙o komibeoba sal 100-ni kamrangko sokate on·china AHAM dolrang Chief Minister Conrad Sangma-o mol·molataha.
