Batanggimin October 4 tariko Chokpot jolo mikkarang jimbee waanichi bang∙a nokjamrang nosto ong·aniko man·e neng·nikanirangko man·gipa manderangna dakchakaniko on·china Chokpot Regional Unit-ni GSU General Secretary Spenser R Sangma Chief Minister Conrad Sangma-na memorandum-ko on·angaha.
Rongrikgrimgre songona kabatgipa dolong aro Rene Badimagre songona kabatgipa dolong-rangko chi bana ong·anio man·pakangani a·selo songsa songgipinona re·rurana gita songdongenggipa manderangna neng·nikanirangko ra·baanina gitalgipa dolong-rangko tarie on·taipilchinaba GSU dolrang aganangaha. Unbaksana Chokpot-oni Sibbariona re·gipa ramarang a·a be·wakani a·selo nosto ong·aniko man·aha,
Baromile ona re·gipa ramarangoba apsan dakgipa obostarang ong·anina ramarangni nosto ong·aniko ta·rake nirokate tarie on·taichinaba uamangni segimin memorandum-o janapangaha. Chokpot Silkigre-ni PHC hospital, Mount Carmel School Chokpot, Chokpotgre Baljim Memorial School, Gongganggre LP School, Silkigre RMSA School, Tengkigre LP School-rangba chi bana ong∙anio nosto ong·ataniko man·e bang∙a skul aro college-rango poraienggipa chatro chatrirangni nanggipa lekka pancharang chi ripenba nosto ong·ataniko man·ahani gimin ta·rake nirokataniko dakchinaba Chokpot Regional Unit-ni GSU General Secretary, Chief Minister Conrad Sangma-o mol·molangaha.
