East Garo Hills, Rongre Sub Forest Beat House sambao da·al pring 12:50 somoirango ML 08 J 1279 Renault Kiger dal·begipa bol pangsani be·dapanichi a·sel ong·aha. Ia a·selko chagronggipa manderang Dalu oni Rongjeng ona re·angmiting somoio ia obostarang ong·aha ine koborna parakataha.
Ia a·sel ong·anio jangnanggipa manderang Dalu Thibapara songoni ong·a jeon saksa Thenseng R Marak biapon janggiko galaha aro uni manggisiko Williamnagar Civil Hospital-ona post mortem ba porikka ra·aniko dakna ra·angaha.
Unbaksana abisa sakgni jean Sengrikchi D Sangma (bilsi 29) aro Clarinda D Sangma (bilsi 27) ia obostao bilongbee saknaanirangko man·anina ta·rake sanna bannaniko ra·na Songsak PHC ona watatani ja·mano nambate sannagita Sengrikchi D Sangma-ko Williamnagar Civil Hospital-ona aro sakgipin Clarinda D Sangma-ko Tura Civil Hospital-ona watatskaaha.
Sianggipa mandeni manggisiko post mortem ka·aniko aro nanggipa kamrangko da·al salon matchotatgen ine u·iataha.
