Khasi-rangna nangan somoirango jringnan ku·rang on·enggipa chong·motan Khasi Students’ Union (KSU) aro Hynniewtrep Youth Council (HYC) dolrang Expert Committee-ni public hearing-ko dakanio Reservation Policy-ko Khasi-Jaintia na 50% ko dakate Garorangna 40% kon donangkuchina u·iataha. Indake ong·engon KSU dolrang 5% ko Schedule Caste-rangna aro 5% ko unreserved category-o donatchina janapangaha.
Ia ku·pattianiko ra·chakjagenchimode 90% ko Khasi, Jaintia aro Garo jatgittamna dakatskachina KSU dolni general secretary Donald V Thabah aganangskaaha. Unbaksana, Reservation Policy-ko batanggiminoni nipiltaigija aro backlog-ko galchange gital policy-ko a·bachengchina Thabah parakangaha. Skigipani kamrangna Garo Hills-o 100% aro Khasi-Jaintia Hills-o 100% ko on·china uamang janapataha. Garorang Khasi ku·sikchi skina man·jawa aro Khasirangba apsandaken Garo ku·sikchi skina man·jawa ine KSU miksonganiko talatangaha.
Apsandaken, HYC dolrangba mande jelbatako nigrike Khasi-Jaintia na 50%, Garorangna 40% aro gipin ST-rangna 3% ko donatchina janapangaha. Minggipin uamangni nangnikaniara 93% ko Garo aro Khasi-Jaintia na apsangrik dakatchina, 2% ko Schedule Caste-rangna, aro 5% ko unreserved category dakatskachina u·iataha. Unbaksana, da·o ja·rikenggipa Reservation Policy-ko a·dokni a·palchi sorkari quota-o dal·a gadangrango poraina rimnapanio jakkaljachinaba parakataha. Iani bidingo uamang Article 15 (A) o pangchake dingtang niamko ra·gatskachina sorkarina ku·pattiangaha.
Bethany Society-ni dilgiparangba Expert Committee-ko gronge Person With Disabilities (PWD) rangna 4% ko chamatchina agane nama bewalo ra·gatchina u·iatangaha.
