Chief Minister Conrad K Sangma, GREEN (Grassroot Level Response Towards Ecosystem Enhancement & Nurturing) Meghalaya Plus Scheme-ko Education Minister Rakkam A Sangma-ni dongpaanio da·al salni bako Tura-o a·bachengate on·angaha.
Ia GREEN Meghalaya Plus Scheme-ara a·dok sorkarini ra·gatgipa Payment for Eco System Services (PES) ni bak ong·e, buring bolgrimrangko ripingna manchie ia scheme-ni ning·o dingtang dingtang songni manderangna hectare-prakon gong 20,000 tangka paisako bilsiprako on·anggen.
Batanggimin salrango sak 3000 manderangna baten ia scheme-ni namgniko man·e, hectare 54,000 buring bolgrimrangko ripingna man·aha aro ia GREEN Meghalaya plus-ni ning·o, hectare 50,000 ba 500 sq km buring bolgrimrangko ripingangdapna miksonganiba dongenga. Ia program-o Chief Minister Conrad K Sangma, buring bolgrimrangko ripingna sorkarini a·bachengatgipa scheme-ko jako ra·e kam ka·enggipa pilak songrangko aro manderangko mittelangaha.
Buring bolgrimrangko tangatpiltaina a·dok sorkari, GREEN Meghalaya (PES) scheme-kon jako ra·aha, bilsignini gisepo a·dok sorkari, buring bolgrimrangko ripinganio gong crore 44-na baten koros ka·angaha aro mikkangchiba buring bolgrimrangko ripingangkuna gong crore 200-na baten tangka paisarangko chame don·ataha ine Chief Minister aganangaha.
Ia program-o CM Elevate, FOCUS aro Payment for Ecosystem Services (PES)-ni namgniko man·giparangna cheque-rangkoba suale on·angjolaha.
