Bangladesh a·songoni sak 5 manderang auto rickshaw-o Dalu oni Purakhasia jolona songreanggiparangko BSF dolrang rim·na man·aha.
October 2 tariko, BSF dolrangni kam ka·enggipa biapni adita chelao Bangladesh-ni sak 5 manderang auto rickshaw ko neng·takate biaponi katna jotton ka·aniko nike uamangko rikange rim·rikna man·aha ine u·ina man·aha.
Ua manderang Chennai, Tamil Nadu-o bara ta·rigipa kharkana-o kam ka·giparang ong·a jean Bangladesh-ona niam gri napsrukangna miksonganiko name dake sing·sandianiko dakani ja·mano ma·sina man·aha. Rim·a man·gipa manderangko Dalu Police Station-ona BSF dolrang pakwatangskaaha.
