Re·baenggipa Busan International Film Festival 2024-o Northeast a·dokrangni jawilatwat tarigiparangko seoke bak ra·na chol on·anina Ministry of Information and Broadcasting-ko Fraternity Art Cine Entertainment, Shillong de·mittelangaha.
A·dokni sakgni jawilwat tarigiparang October 2 oni 11 tarikona South Korea-ni Busan songjinmao ong·atenggipa Busan International Film Festival 2024-o bakko ra·na seokako man·angaha. Indakgipa ja·ku de·anichi Northeast-ni ge·prak a·dokoni jawilwat tarigipa sakgni manderang ia festival-o bakko ra·na man·angenga. Ia seokaniko Directorate of Information and Public Relations (DIPR) nigita Jaintia Hills-ni Simi Khongtiang aro Tura-ni Elvachisa Sangma-ko a·dokni palo re·angna seokangaha.
Ministry of Information and Broadcasting North-East a·dok ge·prakoniko sakgni chadamberangko biming minge dona ge·etangaha jean jawilwat tarigipa aro saksa film festival-oniko award man·gipa jekai National Film Awards, International Film Festival of India ba Mumbai International Film Festivalrangona sokanggiparangko nie baseaniko dakangaha. Bon·kamgipa baseaniko September 25 tariko dakangskaaha.
A·dokni palo seoka man·e watatgiparangna National Film Development Corporation (NFDC) sal bongana ong·atgipa festival-o dongchakna, songreani korosrangko chu·gimik dakchakna u·iatangaha.North-East a·dokni jawilwat tarigiparangko International gadangrangona watatanian uamangko chugipa gadangona ra·dona dakchakaniba ong·gen ine Fraternity Art Cine Entertainment Ministry-ni jotton ka·ani bidingo aganangaha. Busan International Film Festival-ni gita ia jawilwat-rangko tarigiparangna uamangni changa sapaniko mesokna bakrime kamrangko ka·na cholrangkoba on·anggen ineba aganangaha.
