South West Garo Hills a·jani Betasing C&RD Block ni ning·o donggipa Jelbongpara songo Eklavya Model Residential School (EMRS) ko rikna a·songni Prime Minister Narendra Modi da·alo pangchakani ro·ongko songe on·angaha.
Tribal jatrangna poraia skiani a·bao rika cho·anirangko ma·mong sorkarini a·bachengatgipa kam ong·e ge 40 Eklavya Model Residential School rangko Prime Minister-ni jakchi nokdonggae on·angan baksana ge 25 EMRS jean gong 2,800 crore ko chamate Hazaribagh, Jharkhand aro Jelbongpara songnaba pangchakani ro·ongko songe on·angaha.
Ampati DRDA conference hall-o online gita video conference-ko ong·ate pangchakani ro·ongko songe on·anio Additional Deputy Commissionerrang, Dr. Rezina Ch. Marak, Dr. W.C.R. Marak, Betasing-ni BDO CRN Sangma, Zikzak-ni BDO D. Hajong, Purakhasia-ni BDO A. K. Marak, Jelbongparani Nokma, Donald Ch Sangma, Education department-ni aro a·jani gipin officialrang aro chatro chatrirangba tom·anio bakko ra·angtokaha. Unbaksana EMRS Meghalaya-ni Project Coordinator aro MANIDCO Ltd-ni Sarjit Ch baksa Jelbongpara EMRS-ni Contractor Samson Thoho-ba ia tom·anio dongpae bakko ra·angaha.
