West Garo Hills a·jani Babadam songo, All Garo Hills Multipurpose Cooperative Society (AGHMPCS) Ltd uamangni Foundation Day-ko gisik ra·an baksana International Coffee Day-ko da·al salo maniangjolaha.
Ia maniani tom·bimonganiona Meghalaya Legislative Assembly-ni Speaker, Thomas A. Sangma mongsonggipa sokgipa ong·e bakko ra·angaha. Unbaksa, Coffee Board Tura-ni Senior Liaison Officer, Sun Mohammad Ali, Soil & Water Conservation, Tura-ni Divisional Officer, Vivela D. Shira, aro Sub Registrar of Cooperatives, Vallentina K. Marak-ba sokbaaha. Program-o agangiparang coffee-ko ge·e game janggi tangani gadangrangko nambatatna man·ani cholrangko bang·batan aganskie talatangaha.
Da·al salo Vegetable Mission-ko, NEHU Tura-ni Campus Director, Sujata Gurudev-ni jakchi oprake on·angaha. Ia somoio me·su biterangkoba suale on·angjolaha. Iasan ong·aigija, Garo Hills-o coffee-ko ge·e coffee industry-ko dal·roroatna dangdike on·enggipa ge·e game cha·giparangnaba Coffee Board-ni Joint Director, Naveen Kumar Ryntathian-ni jakchi cheque-rangko on·angaha. Ge·am Garden-koba oprakangjole, sak 180 coffee-ko ge·e game cha·enggiparangna dakchakaniko on·agita ge 10 coffee machine-rangko sualangaha.
Ia program-o, coffee-ko tariani bidingoba skie on·angan baksana staff quater-ko oprake on·angaha aro hajal 1000 acre a·arango cashew-ko ge·china cashew chararangkoba sualangjolaha.
