2005 bilsini September 30 tariko, MBOSE-ko Tura-oni bak dake ra·angna am·ani somoio Chandmari kal·chakramo pulis-rang baksa nanggrike sianggipa A·chik matgrikrangko gisik ra·na Tura-ni District Auditorium-o chang 19-gipa Memorial Service-ko ong·atangaha. Ia tom·bimonganiko ‘We Respect Your Sacrifice’ katta bichongo pangchake uamangni jatna dangdike on∙anggipa kamrangko gisiko done 30th Victims’ Solidarity Forum Tura ong·ataha.
Jatni matgrikrangni on·kanganiko mande ra·na bilsirikkit dakrongbaenggipa ia salko gisik ra·aniona GHADC-ni MDC-rang, toromko dilgiparang, ma·apaarang, chatro chatrirang, songsalko dilenggiparang, sianggipani ma·drang aro nokdangni manderang re·bae bakko ra·angtokaha.
Program-ko ong·atani bako sianggipa matgrikrangko mande ra·pilani chingita gamchatgipa memento-rangko uamangni nokdangni manderangna on·angaha. Iasan ong·aigija janggi tangengmitingo uamangni dakanggimin namgipa kamrang aro gunrangko sokbagiparangna poraie on·angaha.
September 30 tarik, chong·motan Garo Hills-o ‘Black Friday’ ine jatni dongimin ia salo A∙chik jatrangoni sak 9 matgrikrang janggitangko gimaataha. September jani 30 tariko A∙chik jatni duk aro saknaaniko pangnan gisik ra∙ronga aro janggirangna Isolo bi·chakronga. Ia salo manderangni re∙jomaniko dakani somoio pulis dolrangni ka∙namgija slairangchi gopongpongani a·sel Tura Chandmari kal·chakramo sak 4 aro Williamnagar Rongrenggre kal·chakramo sak 5 matgrikrangko gulirang nange siaha. Da·al sal sakanti A·chikrangna namen gisik ra·na kragipa aro kal·imna nanggipa ong·a.
