Battanggimin election-ni somoio a·doko poraia skia man·e kam gri dongenggipa chadamberangna lakh 5 kamrangko nakatate on·gen ine ku·rachakgipani bidingo sorkarini ja·ku ga·aniko Tura-ni MDC Bernard N. Marak, Chief Minister Conrad Sangma-o sing·doataha.
Chief Minister-ni a·kange ra·gimingitan uni dolko bilona ra·bapiltaiode aro changsatai Chief Minister ong·na pu·ongenchimode lakh 5 kamrangko on·a ku·chakgipan a·dokni kamgri ong·e neng·skimenggipa chadamberangni ka·dongani ong·enga ine Marak parakataha. Chief Minister ong·e aro da·o absolute majority-ko man·e chadamberangna lakh 5 kamrangko ra·bae on·a bil amaniko Marak aganangaha. Manderang dal·a ka·donganio NPP party-na pu·onaha, indake ong·genchimoba da·o chadamberangni gisepo suk ong·gijanirang ong·katenga mongsongbate poraia skia donge kam gri ong·e dongenggiparang man·e cha·gipa aro bilo donggiparangni gisepo chotchanggija neng·nikanirangko chagrongna nangangkuenga ine Marak parakangaha.
Ru·utgija salrangna skang nurse, home guard aro gipin kamrangna seokaniko parakgija donnue dakaniko mittam chadamberang jaksi otangaha. Kam man·a kragiparangna maming ong·gija dakanirangko ra·bajanagita kam nakatenggiparango kragipa manderangkosa rimnapna nanga. Meghalaya a·dok Christian torom gapgipa biap ong·ani gimin ia obostarang ong·jachina Marak aganangaha.
ASHA worker-rang, AGANWADI, MSSAT, Adhoc aro sorkarini skigiparang, sanna bannanio kam ka·giparang (civil hospital, CHCs, PHCs, HCs), bang·a department-rangni ning·o muster roll ka·enggiparang, home guard, aro mid-day meal cook-rangni man·a nanggnirangko da·o chalaienggipa sorkarini nirok simsakjaenganiko Chief Minister-na u·iataha. ASHA kam ka·giparangna election campaign ka·mitingo tangka gong hajal 2000-oni hajal 3000 on·a ra·doatna ku·chakgipakoba da·ona kingking chu·sokatgija donenga. AGANWADI kam ka·giparangba uamangni man·a nanganiko man·kujaenga aro jemangan MSSAT-ni ning·o skie on·ako man·giminrangba kamoniko ra·gala man·tokaha. Ia pilak ong·enggipa obostarang aro chagrongenggipa neng·nikanirangko nirokate kamrangko ka·chinagita Bernard Marak mol·molataha.
