India a·songo Cancer sabisiko altue aro kraa damo sanna bananiko dakna cholko man·agita mijal salni bako Shillong songjinmani State Convention Hall-o a·dokni Health & Family Welfare Department aro Federation of Indian Chambers of Commerce and Industry (FICCI) baksa bakrime chanchirimangaha.
Ia tom·anio Health & Family Welfare Department-ni Minister Dr. Ampareen Lyngdoh mongsonggipa sokgipa ong·e Cancer sabisiko altue aro kraa damo sakantina sanna bananiko on·a man·agita manderangna ka·donganiko on·angan baksana gamchataniko agan-talatangaha. Apsandaken tom·anio Principal Secretary Sampath Kumar (IAS), Commissioner & Secretary Dr. Joram Beda (IAS), NEIGRIHMS-ni Director Prof. Dr. Nalin Mehta aro FICCI Task Force on Cancer Care-ni Co-Leader Raj Gore dongpae bakko ra·angaha.
Ia tom·e chanchirimanio mongsongbate sabisiko seng·gnang porikka ra·e ma·sisona, Cancer sabisiko sanchakram biaprangko namdapatna, public ba private partnership-rangko ra·dona aro Cancer sabisiko sanna banna neng·nikanirangko chagrongani bidingo chanchirimangaha. Una agreba Cancer sabisiko sanchakram centre-rangko apalatna, mobile Sreening Unit-ko bariatna, scheme-rangna tangka paisanigita dakchakna aro a·doko ta·makku jakkalaniko komiatna miksonge chanchirimangaha.
