Ri-Bhoi a·jani Myngken Christian Higher Secondary School-ni bilsi 17-ni ning·o ong·gipa me·asa dolrang Subroto Mukherjee Sports Education Society-ni ong·atenggipa chang 2-gipa Indo-French Football Tournament-o bakko ra·na okamatako man·aha.
Chang 2-gipa Indo-French Football Tournament-ko re·baenggipa November 25-oni 30 tarikona France a·songni Paris-o ong·atanggen. Ia kal·anio bako ra·na sak 16 kal·giparang chong·motan sakgni goalkeeper, Coach saksa, manager saksa aro a·dokni palo saksa re·anggen.
Bengaluru-o ong·atgipa chang 63-gipa Subroto Cup International Football Tournament-o Myngken Christian HS School-ni robol kal·gipa dolrang runners up-ko man·e chu·sokbaaha. Uamangni bimchipe kal·anirangko nike France a·songo ong·atenggipa tournament-oba kal·taina Subroto Mukherjee Sports Education Society, Meghalaya-ni chadamberangko seokaha.
Meghalaya-ni bilsi 17-ni ning·o ong·gipa me·asa dolrang ia bilsi Tamil Nadu-o ong·atgipa Khelo India Youth Games-o gold medal-ko man·baan baksana gesa niksenggipa Durand Cup tournament-ko adoko bakrime sokachakaha. Shillong Lajong FC dol ia susaanio semi-final-ona sokdoangaha. Iasan ong·aigija, August jao ong·atgipa International Subroto Cup 2024-oba Nongjri Presbyterian Secondary School bilsi 15-ni ning·o ong·gipa me·asa dol 3-0 goal-rangchi Uttar Pradesh-ko amataha.
