Mikkangchi na·tokna milsi pe·susaaniko ong·atenggiparang sorkarini taxation department-oniko No Objection Certificate (NOC) ra·na nanggen aro kajina on·a nanggen ine SWGH-ni Deputy Commissioner Hema Nayak-ni u·iatani ja·mano bang·a manderangni jajaanirang ong·katenganina Tura-ni MDC Bernard Marak talatangaha.
Sixth scheduled-ni ning·o ga·akgipa biaprang sorkarini a·ja ong·ja, District Council-ni ning·osa ong·ani gimin District Administration an·chingni kosako bil on·a man·ja. Taxation department District Council-oba donga aro jemangan milsi pe·susaaniko ong·atenga, uamang District Council-oniko NOC-ko ra·e ong·atnagita man·skagen ine Marak aganangaha.
Ian an·tangtangni District Council-ko dal·e ra·gija a·dok sorkariko dal·nikbate ra·ani a·selo indakgipa obostarang ong·enga. A·dok sorkariko chalaienggipa, manderangni seoke watatgipa dilgiparang a·doktang chigatangko naljoke rakkina man·jaengjok ine Marak aganangaha. A·dok sorkari rorisa ong·a, District Council-sa tribal ba jatna sixth schedule-ni ning·o on·gimin bil ong·a. Uni gimin District Council-ni a·bao maikai a·dok sorkari niamko dakdrana man·gen ine Marak sing·doataha. Pokritango jila kaani ba susaanirangko ong·ataniara a·a nokgipani skaosa pangchaka ine ua agandapangaha.
Nokmani a·kingo dongengipa pokkri, a·a chia aro bading chiwalaniko a·dok sorkarisa kajina ra·na a·kangaiode nokmani bilde ka·sinsin bon·angengjok ba bon·atna jotton ka·engjok ine Marak aganangaha.
