Anganwadi-rangni neng·nikaniko Social Welfare-ni Principal Secretary-na janapata

Garo Hills-o Anganwadi kam ka·giparangni bang·a neng·nikanirangko janapate saksa social activist Cherian Momin Directorate of Social Welfare-ni Principal Secretary Samphat Kumar-na chittiko sedoataha. Anganwadi-rang gamchatgipa ong·e songsalo mikkangchake kamrangko dangdike ong·genchimoba salantio dingtang dingtang neng·nikanirangko chagrongenganian kamtangko name ka·anio ja·guataniko on·enga ine Momin janapataha.Anganwadi-rangna on·gipa phone-rang namjaengani a·selo Poshan Tracker app-ko jakkalna ba nanggipa report-rangko gatatna man·jae neng·nikaniko man·ani bidingo Momin janapataha. Uamangni phone-rang nosto ong·ani gimin sorkarini dongimin nisanrangko chu·sokatna man·gijanikoba Kumar-na ua u·iataha. Unbaksana, Anganwadi-rang man·ani komibeoba mobile data recharge ka·na an·tangtangoniko koros ka·na nangenga aro ian kraani ong·ja ine Momin parakataha. Iasan ong·aigija ma·mong aro a·dokoni bak dake sualgipa gong hajal 7,500 man·a nanggnirangkoba watchange man·enga jean tangka paisanigita sinjetaniko on·enga ineba Momin u·iataha.Songsalo bi·sarangna aro ma·giparangna cha·ani ringanirangko on·ani Anganwadi-rangni mingsa kam ong·a. Indake ong·genchimoba, songchak sanchakna am·bol ba gas-rangko brena ja·manchakbee man·enganiko Momin janapataha. Iani a·selo Anganwadi centre-rango jringna cha·anirangko on·a man·jaenga ine ua parakataha. Unbaksana, songchakani bosturang aro gipin nangchongmotgiparang chu·ongjani a·seloba cha·anirangko on·a neng·nikaniko man·enga ine Momin parakataha.Anganwadi centre-rango Monthly Progress Report (MPR) form-rang donggijanichi nanggiparangko segate ra·na man·jaenga, unbaksana Poshan Tracker app-ko name jakkalna man·jae neng·nikaniko man·enga. Ia centre-rango nanggipa rika cho·anirang komiani jekai nosto ong·gimin a·pa, nokking, aro pakma namgijanirang bi·sarangna  aro Anganwadi-rangnaba kenbegnigipa ong·enga ine Momin janapataha. Unbaksana rack, table aro chokkirang donggijaniko janapate kamtangko name ka·chaknagita ia bosturangko chu·onge on·china aro jatni ganani Dakmandarangkoba sualpachina ua didiatjolaha. Ia centre-rangko bilsoke chalaianian Poshan Abhiyaan, Mission Poshan 2.0 aro gipin scheme-rangni chu·sokani ong·a ine Momin agandapangaha.Chel·chelgipa biaprangchi re·na nanggenchimoba uamangna maming Travel Allowances (TA)-ko on·anirang dongja. Tom·anirangchi, training, aro gipin official kamrangna re·angon man·gnirangko ru·ute aro komie man·ani kosako sinjetaniko on·a ine Momin parakataha. Memo No. SW/CW/APF/7/2012/Pt /12858-903 sal June 2 2023-o pangchake Graduate ba bilsi 5-na kam ka·gimin Anganwadi-rangko ra·doatna tik ka·giminni bidingo ku·chakagita dakjaenganina aro ja·manchakenganinaba ua janapate ta·rake ja·ku ga·china mongsongbate Directorate of Social Welfare-ko ua mol·molataha.