East Garo Hills a·jani Williamnagar songjinmao PHE Minister aro jolni MLA Marcuise Marak, ‘Umbrella Project: Chapter III – Simsanggre’ ko Loyola College-o oprakangenba a·bachengate on·angaha. Meghalaya sorkarini Arts & Culture department, umbrella project-ni ning·ao da·al saloni a·bachenge September 27 tarikona sal 5-na kingking ‘Workshop on Various Arts’ katta bichongo pangchake Loyola College Williamnagar-o workshop-ko ong·atangenga.
A·bachenggipa salni program-ona a·jani Deputy Commissioner Vibhor Aggarwal, Arts & Culture department-ni official-rang, jawilwat tarigiparang, doka dam·anio sapgiparang, chatro chatrirang aro dingtang dingtang a·bao gisiko nanggiparang ra·bae bakko ra·angtokaha. Ia somoio Marcuise Marak, sokbagipa adita chatro chatrirangna sorkarinigita MTAB-rangkoba uamangni skia poraianiko namdapatna miksonge suale on·angjolaha.
Umbrella project-ni ia workshop-o dingtang dingtang changa sapanirang jekai golporangko seani, theatre-o dakmesokani, jatni doka dam·ani, jawilwat tariani, aro minggipin arts-ni a·barangni bidingo skie on·anggen. Ian dingtang mancha arts-ni a·bao gisiko nanggiparangna uamangni u·ianiko aro chanchianiko bakroatna, unbaksana changa sapaniko tang·doatna miksonge ong·atenggipa workshop ong·a.
