Garo Hills-oni adita chadamberang be·en bimangtangko tarie bodybuilding-ni a·bao jotton ka·enggiparang Shillong songjinmao ong·atanggipa chang 48-gipa Meghalaya Body Building Championship 2024-o bakko ra·e chegiparang ong·angtokaha.
Men’s Body building 50-55 kg category-o Bishal Rai gnigipa gadangko man·angaha aro unbaksana Men’s Best Physique 165 cm-ni ning·aoba Rai gittamgipa ong·e cheangaha. Men’s Best Physique 165 cm-na batgipa category-o Arjun Basfor gittamgipa ong·aha aro apsandaken, Men’s Best Physique above 165 cm-o Thaichang Marak gnigpa ong·e cheangskaaha. Bon Jovy Ch. Marak, Men’s Best Physique-o skanggipa gadangona sokdoe medal-ko man·baaha.
Garo Hills-o bodybuilding-ko name a·bachenga ru·utgija somoirangsan ong·genchimoba chadamberangni gisik nanganichi tang·dororoaniko nikna man·enga. A·chikrangoni Atlanta Shira-ni Mr. Meghalaya-ko a·dok gimiko amgopaniba aditaan chadambeskarangna nama dakmesokaniko on·angaha. Uamangni bimchipanichi aro dontonggija ranta ka·anichi skanggipa gadangrangko man·jahaoba chang 48-gipa Meghalaya Body Building Championship 2024-o gnigipa aro gittamgipa gadangrangko man·e Garo Hills-na mikkim rasongko ra·baaha.
