ICAR-Agricultural Technology Application Research Institute (ATARI), Zone VII, Umiam aro College of Fisheries, Lembucherra apsan bakrime Krishi Vigyan Kendra (KVK) ni Annual Zonal Workshop-ko September 19-oni September 21 tarikona College of Fisheries, CAU (Imphal), Lembucherra Tripura o ong·atangenga. Ia workshop-o Meghalaya, Manipur, Mizoram, Nagaland aro Tripura a·dokrangoni ge 43 KVK rang bak ra·angtokenga.
Workshop-ko Tripura-ni Governor N. Indrasena Reddy-ni jakchi oprakangaha jeon ua KVK-ko laboratory aro uni a·palo ba ge·a gama baksa nangdimatgipa ong·aniko parakangaha. KVK-ni kamrangko ua janapange, uamangni skianirang aro dangdike on·anichi Northeast a·jarango 50℅ mangnigita geme cha·giparangna namgniko ra·baaha ine Governor aganangaha. Indian Council of Agricultural Research (ICAR) aro Central Agricultural University, Imphal-ko agricultural technology transfer-ko dakchengdilanina rasongko on·angan baksa chadamberangna mikkangchi game ge·e cha·ani a·bao kamrangko bikotchina Governor didiangaha.
Central Agricultural University Imphal-ni Vice Chancellor Dr. Anupam Mishra, Northeast-ni bakrango na·tokrangko jilanio baikamgipa cholrangko jakkalna kamrangko ka·enganina College of Fisheries-ni gamchataniko janapangaha. KVK aro College of Fisheries- ni apsan kam ka·anichi songrango na·tok jilgiparangna samtangtango donggipa sam bolrangko nosto ka·gija gital chasongni cholrangko jakkale manderangni janggi tanganiko namroroataha ine Mishra aganangaha. Northeast a·dokrango na·tok jilaniko bariatna aro baikamgipa jilani cholrangko NE a·dokrango jakkalna bakrime kam ka·na nangkuenganikoba Mishra parakangjolaha.
Ia salgittamni workshop-o dingtang dingtang dakna miksongenggiparang jekai stakeholder-rangni golpogrikani, Agri-Industry/FPO rangni tom·ani, aro ge·a gamani, jila kaanirango bikotgimin gital chasongni kolrangko mesokna am·enganiko ICAR-ATARI Zone Vll, Director Dr. A. K. Mohanty aganangaha. Iarangoni mongsonggipade, PPV & FRA workshop ong·a jeon chengoni ja·rikbaenggipa bitchilko ripinganiko tange rakkiangkuna aro game cha·giparangni on·gimin bilrangko chelchakna nanganian Northeast-o dakbaenggipa ge·a gamani gunko rakkiani ong·gen. Iarangko dakanichi ma·sianiko bariatna, policy-rangko nipiltaina, saksa sakgipinoniko talgrike ra·na aro KVK-ni chu·sokanikoba gisik ra·atani ong·gen ine CAU Tripura College of Fisheries ni Dean Prof. A. B. Patel aganangaha.
