Delhi-ni gitalgipa Chief Minister ong·e kam ka·na Atishi Marlena re∙baenggipa September 21 tarik, Sonibar salo ku∙mikchetanggen ine parakataha. Unbaksa AAP-ni gipin dilgiparangba Cabinet Minister-ni kamrangko jako ra∙e ka∙angna ku∙mikchetangjolgen.
Athisi-ko Delhi-ni gitalgipa CM ong·na seokaniara, re∙anggipa Robibar sal, September 15 tariko Delhi-ni gitcham Chief Minister Arvind Kejriwal uni kamtangko wate on∙ani a∙sel ong∙aha. Kejriwal-ko Delhi liquor policy case-o tangka paisarangko kragija jakkalsretaha ine BJP dolrangni matnanganichi uko ja 5 na kingking pattoko chipe donaha jekon September 13 tariko court-nigita una jamin on∙angaha. Indake ong∙engon, manderang uko ka∙donge mikkangchi seoktaianiko dakgenchimode CM-ni kamko jako ra∙e ka∙angtaigen ine Kejriwal aganangaha.
