West Garo Hills, Jengjal Sub-Divisional Hospital-o sanna bannanio dangdike on·enggipa Surgeon saksani simsakgija kamrangko ka·anina uni kosako am·sandianirangko dakchina A·chik State People’s Front (ASPF) dolrang Health Minister Ampareen Lyngdoh-na chittiko sedoataha.
Battanggimin January 29, 2024 tariko North Garo Hills Lower Nengsa songni Mensilla N. Marak-ko Jengjal Sub-Divisional Hospital-o Cesarean Section operation-ko ka·ani somoio Dr. Suzie Paul Francis (surgeon) simsakgijani a·selo bandage-ko okningo chipchapatmanaha ine ASPF dolrang u·iatangaha. Surgery-ko ka·ani ja·mano Marak dongtogija saknaaniko man·anina sonography ka·anio chipchapatgimin bandage-ko u·ina man·aha. Indake simsakgija dakanichi sagipa mandeko dongtogija saknaatan baksana ian simsakgija aro ka·saninggija sanna bannani ong·a ineba ASPF dolrang janapangaha.
Indake ong·engon sanna bannaniko ra·enggiparangna mikkangchi indakgipa obostarangko chagrongna nangtaijanagita Dr. Suzie Paul Francis-ni kosako nambate am·sandianirangko dakate nanggipa ja·kurangko de·e kragipa sastiko on·china ASPF dolrang Health Minister Ampareen Lyngdoh-ko mol·molataha.
