South West Garo Hills Garobadha bajaro niamni a·palo ba nanggipa lekka pancha gri kam ka·enggiparangko champengsona man·agita Labour Licence aro Trading for Non-Tribal (TNT) certificate-rangko Labour Department baksa bakrime nirok sandiangna A·chik State People’s Front (ASPF) dolrang a·jani Deputy Commissioner-na chitti see mol·molataha.
Uamangni chittio janapatanigitade, gipin a·dokrangoni kam ka·na re·bagiparangna Garobadha damsa mongsonggipa biap ong·a jeon Bihar aro India-ni sepangbatgipa Bangladesh a·songrangoni re·bae kamrangko ka·enga. Indake ong·engon ia kam ka·na re·bagiparango nanggipa lekka pancharang donga ba donggijaniko nirokjringna nangenga.
Uamangni chittio minggni dakna nanganirangko janapataniara skanggipao, Garobadha bajaro kam ka·na rakkiako man·giparango nanggipa lekka pancharangko nirok sandiangna tik ka·aha. Gnigipao Garobadha bajaro kam ka·enggiparango nanggipa lekka pancharangko niroke lekka pancha gri niamni a·palo kam ka·enggiparangni kosako nanga ja·kurangko de·angna u·iatangaha.
Ia pilakkon nigrike Law Department baksa bakrime jolni sima arirango nirok simsaksona man·agita a·jani DC office-o tom·e chanchirime nanggipa ja·kurangko de·angna mol·molataha.
