South West Garo Hills, Ampati H.Q-oni All Garo Hills Anganwadi Workers and Helpers Federation, Poshan Tracker-ni kamrangko name ka·piltaina man·agita gital phone-ko nangenganina Shillong songjinmani Directorate of Social Welfare-ni Director-na memorandum-ko on·angaha.
Batanggimin chango uamangna on·gimin phone-rang nosto ong·aha aro Poshan Tracker app-ko chalaina bilmangijagipa ong·a ine Anganwadi dolrang parakataha. Iani bidingo bang·a changon janapahaoba maming ja·kurangko ga·a dongjaha. Sorkarini nangnikagita kamrangko ka·na sikgenchimoba mobile phone-rang dongjani a·selo ja·guaniko man·a ineba uamang parakataha.
Bang·a Anganwadi-rangan kangal cholgri ong·e gital phone-rangko ra·na man·gijanikoba All Garo Hills Anganwadi Workers and Helpers Federation u·iataha. Ia neng·nikarangoni kolgapatna man·agita Anganwadi kam ka·giparangna gital mobile phone-rangko jagnini gisepo on·jaode uamangni jingjengatenggipako dakangkuna Directorate of Social Welfare-ni Director-na mikrakaniko on·ataha. Phone-rang on·genchimode department-ni ge·etagita nisanrangko chu·sokatna man·anisan ong·aigija Phosan Abhiyaan-ni chu·gimik chu·sokani ong·gen ine uamang janapatjolaha.
