Tura Don Bosco Higher Secondary School-o re·anggipa September 10 tarikoni ong·atenggipa 6-gipa Buccieri Memorial Inter School Basketball Tournament 2024, mijal salo final susaanirang chu·sokangan baksa name matchotangaha. Ia susaaniko Don Bosco School Higher Secondary Section, Tura-ni Padot aro school-ko a·bachengate donangipa Lt. Rev. Fr. Anthony Buccieri-ko gisik ra·na bilsirikit ong·atronga.
Chang 6-gipa Buccieri Memorial basketball kal·susaaniko bilsi 14-ni ning·o aro bilsi 14-na batgipa me·asa aro me·chik chadamberangna ong·atangaha. Batanggimin bilsirangogitan ia changoba susaanio bakko ra·na Garo Hills-ni bang·a bakrangoni adita school-rang re·batokaha jeon chu·gimik ge 26 school mang chegipa ong·na susagrikangaha.
Bon·kamgipa kal·susaani salona Christian Girls Higher Sec. School, Tura ni Principal Anna Zelda Momin, Don Bosco Higher Sec. School, Rongkhon-ni Principal Fr. Martin Marak, Don Bosco College Tura-ni Principal Fr. Januarius Sangma aro kal·susaaniko ong·atenggipa School chongmotan Don Bosco Higher Sec. School, Tura-ni Principal Fr. Threnius N. Sangma mongsonggipa sokgipa ong·e nina re·batokaha.
Final kal·susaanirangko U-14 aro una batgipa me·asa aro me·chik dolrangna ong·atangaha. U-14 me·asarangni final-ko Don Bosco Higher Secondary School, Tura -A aro Bosco Mount Rongkhon, Tura kal·aha jeon Bosco Mount 32-30 basket-rangko man·e chegipa ong·aha. Me·chikrangni U-14 category-o Christian Girls Higher Secondary School, Tura baksa St. Xavier’s Higher Secondary School, Tura susagrikangaha. St. Xavier’s Hr. Secondary School chu·gimik somoio 6-4 basket-ko chipna man·e me·chikrangni U-14 category-o chegipa ong·aha.
Bilsi 14-na batgipa me·chikrangni final susaanio Christian Girls Higher Secondary School Tura baksa Tura Don Bosco Higher Secondary School susagrikangaha. Ia chango A-14 category-o skanggipa biapko Don Bosco Hr. Secondary School Tura 19-9 basket-rangko man·e an·tangni school-ni chegipa ong·aniko biming segatangaha.
Me·asarangni A-14 final-ko bak rengsi apsangipa school ge·gni chong·motan Don Bosco Higher Secondary School, Tura-A aro Don Bosco Higher Secondary School, Tura-Night Shift susagrikna nangao ga·akaha. Uamangni dolgnini susagrikani nigipa aro chakgiparangna namen an·saobegipa ong·aha jeon dolgnian bak rengsi apsangipa school-rang ong·genchimoba rakbee susagrikaniko krenganichi dakmesokaha. Uandake, me·asarangni A-14 category-ni final-ko Don Bosco School Hr. Sec. Section Tura Day shift 25-23 basket-ko man·enba Night Shift-ko gnigipa biapo rakkinagita chu·sokaha. Ia bilsiko ra·e Don Bosco School Hr. Secondary Section gnigipa changna Buccieri Memorial Inter School tournament-ko cheaha.
Bilsi 14-na batgipa category-o me·asarangni gisepo Best Player-ko James Tirkey aro me·chikrangna Silkimchi S. Sangma man·angaha. U-14 ni category-o me·asarangna Ranggam A. Marak man·angaha aro me·chikrangni gisepo Salosa A. Sangma man·angskaaha.
