Chang 4-gipa Inter Mahari Men’s Football Tournament 2024-ni gnigipa semi final susaanio Agitok mahari goal 2-0 chi Dopo mahariko amate final-ona sokdoangaha. Agitok maharirang final-ko September 21 tariko Bolwari mahari baksa P A. Sangma sport complex kal·chakramo susaangskagen.
Agitok maharina kal·ani a·bachenggipa 8 gipa minute-o Balkin A. Sangma skanggipa goal-ko chipe on·aha jeon Dopo maharirang skanggipa half-o neng·nika gnang kal·angaha. Agitok maharirang nambate aro ma·rape suale kal·na man·e a·bachenggipa half-o 1-0 chi skangsoe dongna man·aha. Kal·ani minute 59-gipao Rosan A. Sangma, Agitok dolna gnigipa goal-ko chipe Dopo maharini kosako chegipa ong·aha.
Indake ia changni Inter Mahari Men’s Football Tournament 2024-o Agitok mahari final-ona sokdoe gnigipa changna final-ko chena kal·angtaigen. 2023 bilsioba uamangan ia susaanio chegipa ong·angaha aro ia chango trophy-na chel·chake Bolwari baksa final-o susaanggen.
