Meghalaya a·doko matchuko a·songni ma·gipa ine ra·gatna “Gau Dhwaj Yatra” ko Shillong songjinmao dakna am·ani gisepo Cabinet Minister aro Rongara Siju-ni MLA Rakkam Sangma, matchu be·enko cha·anichi immune system ba mandeko sabisirangoni chelchake dongani bilko bariata ine aganangskaaha. Matchu, samsirangko cha·gipa ong·ani gimin sabirangoniko chel·chakaniko bilakatna sikgenchimode matchu be·en cha·na ua manderangko didiangaha. Ua matchu be·enko uni namnikbatgiparangoni mingsa ong·aniko parake, toromko cha·a ringani ranta baksa nangdimatjachina a·dokni palo aganangaha.
Jatni dilgipa Pa P. A. Sangma-ni agangipa kattarang chong·motan matchu be·enko cha·anichi badiaba toromna gisik sa·dikani ong·naba gnang jekon cha·taijaoba chingni manderangna gisik sa·dikaniko ra·baskagen ine agananiko ua janapangaha. Manianirango aro sia bon·arango matchuko on·kangna nanganikoba ua parake ian toromna batgipa aro uni a·palo ong·a ine aganangaha. Darangba sakgipinko maiko cha·gen aro cha·jagen agana man·ja. Matchuko chel·chakenggipa dolrang kakketgipa ong·ja, uamang Hindu-rangni bebe ra·ani ja·pang chong·motan saksa sakgipinni toromko mande ra·anikon u·ija ineba Sangma parakangaha.
Food & Civil Supplies Minister, Comingone Ymbon-ba iani bidingo bakko ra·pae darangba Meghalaya a·dokni manderangni cha·ani ringani rantako agana nangja aro iani bidingo ua Chief Minister baksa agangolpogrikgen ine aganangaha.
